dikha do hum ko wo jalwa jo musa ko dikhaya tha

dikhā do ham ko vo jalva jo muusā ko dikhāyā thā

zarā ham bhī to dekheñ kis tarah ġhash un ko huuñ thā

na ḳhud dekhā na ye pūchhā kisī se ab vo kaisā hai

isī ḳhūbī pe pahle ik nazar jalva dikhāyā thā

ġham-e-furqat se kah duuñ yuuñ to mat barbād kar is ko

ye dil vo hai ki jis ko apnā ghar tum ne banāyā thā

lab-e-mo'jiz-numā ko shikva hai kyuuñ merī ġhaflat kā

mirī turbat pe aa kar qum-bi-iznī kab sunāyā thā

chhupe tum ham se achchhā ḳhair par ye bhī samajhte ho

ki kyā shai dekhne ko ham ne tum se dil lagāyā thā

batā detā agar ḳhāk-e-madīna tujh ko qudrat thī

ḳhudāvandā mujhe gar ḳhaak hī tū ne banāyā thā

paḌā sotā thā maiñ ḳhvāb-e-’adam meñ kaisī rāhat se

na paayā chain dam-bhar 'ishq ne jab se jagāyā thā

terī chaukhaT kā bhī allāhu akbar kaisā rutbā hai

ki jibra.īl-e-amīñ ne us pe sar aksar jhukāyā thā

pata 'mumtāz' ke lāshe kā hasrat yuuñ batātī hai

ye vo hai jis ne mahbūb-e-ḳhudā se dil lagāyā thā

dikha do hum ko wo jalwa jo musa ko dikhaya tha

zara hum bhi to dekhen kis tarah ghash un ko hun tha

na KHud dekha na ye puchha kisi se ab wo kaisa hai

isi KHubi pe pahle ek nazar jalwa dikhaya tha

gham-e-furqat se kah dun yun to mat barbaad kar is ko

ye dil wo hai ki jis ko apna ghar tum ne banaya tha

lab-e-mo'jiz-numa ko shikwa hai kyun meri ghaflat ka

meri turbat pe aa kar qum-bi-izni kab sunaya tha

chhupe tum hum se achchha KHair par ye bhi samajhte ho

ki kya shai dekhne ko hum ne tum se dil lagaya tha

bata deta agar KHak-e-madina tujh ko qudrat thi

KHudawanda mujhe gar KHak hi tu ne banaya tha

paDa sota tha main KHwab-e-’adam mein kaisi rahat se

na paya chain dam-bhar 'ishq ne jab se jagaya tha

teri chaukhaT ka bhi allahu akbar kaisa rutba hai

ki jibrail-e-amin ne us pe sar aksar jhukaya tha

pata 'mumtaz' ke lashe ka hasrat yun batati hai

ye wo hai jis ne mahbub-e-KHuda se dil lagaya tha