مٹائیں صبر دل سے صبر کی تلقین فرمائیں

مٹائیں صبر دل سے صبر کی تلقین فرمائیں

سکون دل وہی چھینیں وہی تسکین فرمائیں

محبت میں زبوں حالی کی وہ تزئین فرمائیں

وہ غم دیں ضبط غم کی داد دیں تحسین فرمائیں

مجاز عشق کی دشواریاں شاید حقیقی ہیں

وہ سن سن کر دعائیں ورنہ کیوں آمین فرمائیں

سکون حسن جانے اضطرار عشق کیا شے ہے

تلّون کیا ہے اس کو صاحب تمکین فرمائیں

ذہینؔ اس میں خود ان کے حسن کامل کی اہانت ہے

بھلا وہ اور میرے عشق کی توہین فرمائیں