اے حسن_حقیقی نور_ازل
اے حسن حقیقی نور ازل
تینوں واجب تے امکان کہوں
تینوں خالق ذات قدیم کہوں
تینوں حادث خلق جہان کہوں
تینوں مطلق محض وجود کہوں
تینوں علمیا اعیان کہوں
رواح نفوس عقول مثال
اشباہ اعیان نیہان کہوں
تینوں این حقیقت ماہیت
تینوں عرض صفت تے شان کہوں
انوائے کہوں اوضاعے کہوں
اتوار کہوں اوضاعے کہوں
تینوں عرش کہوں افلاک کہوں
تینوں ناز نعیم جنان کہوں
تینوں تت جماد نبات کہوں
حیوان کہوں انسان کہوں
تینوں مسجد مندر دیر کہوں
تینوں پوتھی تے قرآن کہوں
تسبیح کہوں زنار کہوں
تینوں کفر کہوں ایمان کہوں
تینوں بادل برکھا گاج کہوں
تینوں بجلی تے باران کہوں
تینوں آب کہوں تے خاک کہوں
تینوں باد کہوں نیران کہوں
تینوں دشرتھ لچھمن رام کہوں
تینوں سیتا جی جانان کہوں
بلدیو جسودا نند کہوں
تینوں کشن کنہیا کان کہوں
تینوں برما بشن گنیش کہوں
مہادیو کہوں بھگوان کہوں
تینوں گیت گرنتھ تے بید کہوں
تینوں گیان کہوں اگیان کہوں
تینوں آدم حوا شیث کہوں
تینوں نوح کہوں طوفان کہوں
تینوں ابراہیم خلیل کہوں
تینوں موسیٰ بن عمران کہوں
تینوں ہر دل دا دل دار کہوں
تینوں احمد عالی شان کہوں
تینوں شاہد ملک حجاز کہوں
تینوں بایس کون مکان کہوں
تینوں ناز کہوں انداز کہوں
تینوں حور پری غلمان کہوں
تینوں نوک کہوں تینوں ٹوک کہوں
تینوں سرخی بیڑا پان کہوں
تینوں طبلہ تے طبنور کہوں
تینوں ڈھولک تے سربان کہوں
تینوں حسن تے ہار شنگار کہوں
تینوں عشوہ غمزہ آن کہوں
تینوں عشق کہوں تینوں علم کہوں
تینوں وہم یقین گمان کہوں
تینوں حسن کوی ادراک کہوں
تینوں ذوق کہوں وجدان کہوں
تینوں سکر کہوں سکران کہوں
تینوں حیرت تے حیران کہوں
تسلیم کہوں تلوین کہوں
تمکین کہوں عرفان کہوں
تینوں سنبل سوسن سرو کہوں
تینوں نرگس نا فرمان کہوں
تینوں لال داغ تے باغ کہوں
گلزار کہوں بستان کہوں
تینوں خنجر تیر تفنگ کہوں
تینوں برچھا بانک سنان کہوں
تینوں تیر خدنگ کمان کہوں
سفار کہوں پیکان کہوں
بے رنگ کہوں بے مثل کہوں
بے صورت ہر ہر آن کہوں
صبوح کہوں قدوس کہوں
رحمان کہوں سبحان کہوں
کر توبہ ترت فریدؔ سدا
ہر شے نوں پر نقصان کہوں
اے پاک الکھ بے عیب کہوں
آیا ہک بے نام نشان کہوں
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
