جمال مصطفیٰ کی روشنی ہے بزمِ امکاں میں

جمال مصطفیٰ کی روشنی ہے بزمِ امکاں میں

گلِ باغِ رسالت کی مہک ہے ہر گلستاں میں

تلاش جان جاں ہے گر تمہیں مجھ سے پتا سن لو

انہیں پاؤ گے اکثر چشمِ گریاں زخم خنداں میں

نظر دیکھے بھلا رخ کی تجلی غیر ممکن ہے

سما جاتے ہیں لیکن ان کے جلوے قلبِ ویراں میں

ہر اک ذرہ ہے رشکِ مہر ہر کانٹا گلستاں ہے

کبھی دیکھا نہیں زاہد نے جا کر کوئے جاناں میں

قسم کھاتا ہو جس کے گیسو و رخ کی وہ خالق بھی

بتاؤ ہے کوئی ایسا بھی یوسف یوسفستاں میں

تمہی دل ہو تمہی جاں ہو تمہی ہو دین و ایماں سب

تمہاری آرزو دل میں تمہی ہو دل کے ارماں میں

جنابِ عائشہ گم گشتہ سوزن ڈھونڈھ لیتی ہیں

چمک اللہ اکبر کس قدر ہے دُرِّ دنداں میں

تری رحمت کی وسعت اے تعالیٰ اللہ تعالیٰ اللہ

چلے آئے سمٹ کر ہر دو عالم تیرے داماں میں

ثنا کس طرح ممکن ہو بھلا ہم سے محمد کی

صفت جس کی بیاں کرتا ہو خالق خود ہی قرآں میں