زمیں اجمیر کی ہے سجدہ گاہِ عاشقاں خواجہ

زمیں اجمیر کی ہے سجدہ گاہِ عاشقاں خواجہ

تمہارا آستاں ہے کعبۂ ہندوستاں خواجہ

گھٹا رحمت کی طیبہ سے اٹھی اور ہند پر برسی

عطا بن کر رسولِ پاک کی آئے یہاں خواجہ

سلاطینِ زمانہ سر کے بل آتے ہیں چوکھٹ پر

حقیقت میں تمہیں ہو والی ہندوستاں خواجہ

فنافی الشیخ ہو کر دل کی آنکھوں سے کوئی دیکھے

ادھر خواجہؒ اُدھر خواجہ یہاں خواجہ وہاں خواجہ

حسینانِ جہاں زلفوں سے جھاڑیں فرشِ مرقد کو

تو روحِ عاشقاں خواجہ تو جانِ گل رُخاں خواجہ

مرادیں کیسی بھرتے ہو خزانے کیا لٹاتے ہو

چلی آتی ہے دنیا کارواں در کارواں خواجہ

ملا کر عشق و نغمہ کو نفس کے تار چھیڑے ہیں

حریمِ حسن میں ہے ایک شور الاماں خواجہ

منور ہے، معطر ہے، مطہر ہے، مقدس ہے

ترے روضہ پہ ہوتا ہے طوافِ قدسیاں خواجہ

کہاں پہنچا کرم سے آپ کے در کا گدا عارفؔ

عنایت کی نظر کا راز چھپتا ہے کہاں خواجہ