نعمت ہے بڑی شفقتِ محبوب الٰہی

نعمت ہے بڑی شفقتِ محبوب الٰہی

اللہ رکھے الفت محبوب الٰہی

آنکھوں میں بسی صورت محبوب الٰہی

دل میں ہے مرے عظمت محبوب الٰہی

پوشیدہ نہیں شوکتِ محبوب الٰہی

یہ زندہ حقیقت ہے کہانی نہ فسانہ

درویش کی عظمت کا نہیں کوئی ٹھکانہ

کیا ملک ہے، کیا تاج ہے، کیا تخت شہانہ

قدموں میں جھکے آکے سلاطین زمانہ

یہ شان ہے یہ سطوتِ محبوب الٰہی

جاگیر یہاں شیخ کی پنڈت کی نہیں ہے

نفرت کہاں، بو باس بھی نفرت کی نہیں ہے

دنیا ہے محبت کی عداوت کی نہیں ہے

تفریق یہاں مذہب و ملت کی نہیں ہے

ہر ایک پہ ہے شفقتِ محبوب الٰہی

سب حسنِ حقیقت کی ہے دیدار نمائی

آنکھیں ہوئیں روشن تو جِلا قلب نے پائی

جو بات محب میں وہی محبوب میں آئی

جو روزِ ازل وارثِ عالم نے دکھائی

صورت ہے وہی صورتِ محبوب الٰہی

کیا حسنِ حقیقی پہ جلال آیا ہوا ہے

گم ہوش ہیں عارفؔ کے بھی حال آیا ہوا ہے

دنیا ہےحسیں کس کا خیال آیا ہوا ہے

ہر شے متبسم ہے جمال آیا ہوا ہے

اللہ غنی جلوتِ محبوبِ الٰہی