کبھی خواب میں آ میرے کملی والے

کبھی خواب میں آ میرے کملی والے

کبھی روئے روشن دکھا کملی والے

سمایا ہوا ہے تو ذات خدا میں

تری ذات میں ہے خدا کملی والے

کسی طرح ہو قید غم سے رہائی

ہمارے لئے بھی دعا کملی والے

مری ناؤ نکلے گی کب تک بھنور سے

کہ تو ہے مرا نا خدا کملی والے

محبت کا بیمار دم توڑتا ہے

نہیں اب امید شفا کملی والے

مجھے بھی شراب محبت پلا کر

تو مستانہ اپنا بنا کملی والے

ہوا شق قمر اک اشارہ سے کس کے

تھا ادنیٰ ترا معجزہ کملی والے

بھرے دم کوئی کس طرح عاشقی کا

فدا تجھ پہ خود ہے خدا کملی والے