رب کے سورج سے نمودار ہوا دن میرا
رب کے سورج سے نمودار ہوا دن میرا
آپ کے نور سے روشن ہوا باطن میرا
آپ کی مہر ہی دنیا میں نگہباں ہے مری
آپ کا لطف ہی عقبیٰ میں ہے ضامن میرا
جادۂ عشق و اطاعت پہ رہے میرا قدم
چشمِ رحمت کے لیے کام ہے ممکن میرا
کب بلائیں گے مجھے اب نہ بلائیں گے اگر
عمر کی آخری حد چھونے لگا سن میرا
ایسا مفلس ہوں کہ ہے کاسۂ اعمال تہی
پھر بھی کیا غم کہ مدینے میں ہے خازن میرا
نفسِ سرکش کو کچلنا ہے مدد فرمائیں
میرے قبضے میں تو آتا نہیں یہ جن میرا
میرے اچھے برے اعمال کی پونجی ہے یہی
آپ کے سامنے ہے ظاہر و باطن میرا
آپ کی مدح مرے حیطۂ قدرت میں کہاں
ہونٹ ساکت ہیں مرے خامہ ہے ساکن میرا
وہ نظر رکھتی ہے عاصیؔ مجھے زیرِ تعلیم
ان کی شفقت کے سوا کون ہے محسن میرا
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
