طیبہ میں سدا صبحِ مسلسل کا سماں ہے

طیبہ میں سدا صبحِ مسلسل کا سماں ہے

جس شہر میں سورج ہے وہاں رات کہاں ہے

آدم سے چلے ذکر اگر تا بہ مسیحا

سب تیری ہی مدحت بہ حدیثِ دگراں ہے

اے کعبۂ دل قبلۂ جاں منزلِ مقصود

ہر قافلۂ زیست تری سمت رواں ہے

کتنے ہی ابد تیری نبوت کے ہیں جن میں

اک ذرے سے کم سلطنتِ کون و مکاں ہے

چیونٹی بھی ترے فضل سے ہم شانِ سلیماں

تنکا بھی ترے عدل سے اک کوہِ گراں ہے

بن تیری توجہ کے ہیولیٰ ہے مری ذات

پتھر ہے نہ گوہر ہے نہ ارزاں نہ گراں ہے

ہم رہتے ہیں طیبہ میں کہیں بھی ہو سکونت

سورج کے علاقے میں ہے جو ذرہ جہاں ہے

مقصورۂ اقدس میں حضوری کے یہ لمحات

کونین میں یہ لذتِ نایاب کہاں ہے

تجھ سے بھی مرا ربط خدا سے بھی مرا ربط

تو دل میں مکیں ہے وہ قریبِ رگِ جاں ہے

اب دل میں بھی آتا نہیں احساس بدی کا

وہ چشمِ کرم یوں مِری جانب نگراں ہے

اے عشقِ نبی زندہ و پائندہ رہے تو

تو ہی تو مرا حاصلِ عمرِ گزراں ہے

اب مجھ کو درودوں کے تسلسل سے نہ روکو

اک لمحہ جو رک جاؤں تو صدیوں کا زیاں ہے

غالب کے بقول اس شہِ کونین کو توصیف

اللہ کو زیبا ہے کہ وہ مرتبہ داں ہے

سرکار میں حسرت کدۂ حرف و بیاں ہوں

سامانِ ندامت ہے قلم ہے زباں ہے