شرف ملا بشریت ذوالاحترام ہوئی
شرف ملا بشریت ذوالاحترام ہوئی
جہاں میں رحمتِ سرکار اتنی عام ہوئی
زمینِ یثرب و بطحیٰ ترے قدم چھو کر
فلک مقام ہوئی عرش احتشام ہوئی
حرم کے چہرۂ خوش پر ہوئی طلوع سحر
صنم کدوں کے رخِ بدنما پہ شام ہوئی
نفاذ پا گیا منشورِ عدل و امن و وفا
جو کائنات ترے زیرِ انتظام ہوئی
مخالفوں کی عداوت بجائے تیغ و سناں
تری محبتِ خاطر کشا سے رام ہوئی
ملی ہے شانِ کرم تجھ کو کُل جہاں کے لیے
سب امتوں کی شفاعت بھی تیرے نام ہوئی
حضور صبحِ مدینہ نصیب کب ہوگی
حضور اب تو مری زندگی کی شام ہوئی
ترے مدینے سے آگے نہ وقت ہے نہ مقام
حدِ زمان و مکاں اس جگہ تمام ہوئی
جو سطر میں نے رقم کی ترا درود بنی
جو بات میں نے ادا کی ترا سلام ہوئی
لکھے قلم نے محامد تو خوش نویس ہوا
پڑھیں زبان نے نعتیں خوش کلام ہوئی
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
