اک رند پہ واللہ یہ فیضان_مدینہ

اک رند پہ واللہ یہ فیضان مدینہ

رگ رگ میں نظر آتے ہیں سلطان مدینہ

کھلتے ہیں محبت سے ہی اسرار نہاں بھی

ایمان کا حاصل تو ہے عرفان مدینہ

مشتاق قدم بوسی ہے خود عرش الہی

اے صل علیٰ سطوت سلطان مدینہ

حسنین و علی فاطمہ زہرہ و محمد

کیا خوب مہکتا ہے گلستان مدینہ

جبرئیل لگاتے یہاں دن رات ہیں چکر

بیت رے یہ مرتبہ یہ شان مدینہ

درکار نہیں بادہ و ساغر انہیں ساقی

سرشار محبت ہیں یہ رندان مدینہ

کیوں نام محمد پہ نہ جاں اپنی لٹاؤں

کاوشؔ میں ازل ہی سے ہوں قربان مدینہ