نور ارض وسما ہے وہ رب العلیٰ

نور ارض وسما ہے وہ رب العلیٰ

طرفہ نور علی نور نور ھدی

مالک الملک خلاق جاں ہے وہی

مظہر ومصدر کن فکاں ہے وہی

وہ احد بھی ہے ایسا کہ ثانی نہیں

جاوداں ہے وہ ایسا کہ فانی نہیں

ابتدا ہے نہ اس کی کوئی انتہا

مستوی ہے وہی از کجا تاکجا

ذات پاک اس کی بے عیب لاریب ہے

کون اس کے سوا عالم الغیب ہے

مالک خیروشر ہے وہ مختارِ کل

فیضاب اس کے اکرام کے خار وگل

حمد خالق کرے عقل محدود کیا

کرسکے بے زباں وصف معبود کیا

ہو سیاہی سمندر ہوں شاخیں قلم

حمد رب ہو نہ پائے گی پھر بھی رقم

کیف زا ایسی سبع مثانی کہاں

حمد وعہد و دعا جاودانی کہاں

ماعرفناٰک ہے قول خیرالوریٰ

حمد ہوگی جلیلؔ اور ما سوا