جو کہ شیدائے_رسول_مجتبیٰ ہو جائے_گا

جو کہ شیدائے رسول مجتبیٰ ہو جائے گا

خاص مقبول جناب کبریا ہو جائے گا

روضۂ حضرت پہ پہنچائے گی گر تو مری خاک

یہ تیرا احسان مجھ پر اے صبا ہو جائے گا

جو در حضرت پہ مٹ جائے گا اس کی خاک کو

خاص حاصل رتبۂ خاک شفا ہو جائے گا

انبیا حیران رہ جائیں گے جس دم حشر میں

آپ سے اللہ کا وعدہ وفا ہو جائے گا

جوش پر آئے گی جس دم رحمت رب جلیل

ایک عالم مور دلطف و عطا ہو جائے گا

بخشش امت کی حضرت جب کریں گے التجا

مہرباں سب عاصیوں پر کبریا ہو جائے گا

عاشق حضرت ہوں دشمن کی حسد کا ڈر نہیں

زہر قاتل بھی مرے حق میں دوا ہو جائے گا

جو کوئی آل نبی کے غم میں روئے گا تو بس

اس کا ہر اک اشک در بے بہا ہو جائے گا

داغ عشق مصطفیٰ دکھلائے گا رنگ بہار

فصل گل میں زخم دل اپنا ہرا ہو جائے گا

کشتۂ عشق نبی زندہ رہے گا حشر تک

عالم ظاہر میں گرچہ وہ فنا ہو جائے گا

ہر طرف سے ہوگا اس پر رحمت حق کا نزول

چار یاروں کا جو مصروف ثنا ہو جائے گا

جنت الفردوس کا وہ مستحق ہے بالیقیں

جو مطیع آل پاک مرتضیٰ ہو جائے گا

جب خودی مٹ جائے گی بالکل نبی کے عشق میں

اور ہی کچھ مرتبہ اے دل ترا ہو جائے گا

جس گھڑی ہوگی میسر دولت دیدار عام

عاشقوں کا خوب حاصل مدعا ہو جائے گا

جو رہے گا دل سے پابند محبت آپ کا

فکر و غم سے دونوں عالم کی رہا ہو جائے گا

آل پاک مصطفیٰ سے جس کو الفت ہو گئی

وہ مقرب تیرا اے رب العلا ہو جائے گا

پرسش روز جزا کا کچھ نہیں خوف و خطر

جس کا حامی شافع روز جزا ہو جائے گا

گر مدینہ میں ہوا مدفوں نہ میں اے جذب عشق

دیکھ لینا حال میرا کیا سے کیا ہو جائے گا

شکریہ میں اپنی جاں مخلصؔ میں کر دوں گا نثار

گر میسر مجھ کو دیدار آپ کا ہو جائے گا