ہو یکتا غوث صمدانی محی الدین الدین جیلانی

ہو یکتا غوث صمدانی محی الدین الدین جیلانی

تمہاری شان لاثانی محی الدین جیلانی

ہے سیرت وصف رحمانی محی الدین جیلانی

ہے صورت شان سبحانی محی الدین جیلانی

ملے گر تیری دربانی محی الدین جیلانی

نہ لوں تختِ سلیمانی محی الدین جیلانی

ولایت کا ولیوں میں بڑاپا یہ تمہارا ہے

ملی ہے تم کو سلطانی محی الدین جیلانی

فدا تم پر دل و جاں ہیں تصدق تم پہ ایماں ہے

ہو تم محبوبِ سبحانی محی الدین جیلانی

نبی کی آل بھی تم ہو علی کے لال بھی تم ہو

ہمارے نور ایمانی محی الدین جیلانی

محی الدین لقب پایا شبِ معراج میں تو نے

ہے رفعت تیری لا ثانی محی الدین جیلانی

تسلی دل کی تم سے ہے سہارا تم ہو ایماں کا

تمہیں ہو راحت جانی محی الدین جیلانی

یقیں ہے سر پہ خورشید قیامت چتر بن جائے

کہ ہو تم ظل سبحانی محی الدین جیلانی

تمہیں ہو چارہ گر مرے مداوائے مرض تم ہو

تمہیں ہو درد و پنہانی محی الدین جیلانی

تمنا ہے ترے ارماں اگر دل میں میرے آئیں

کروں میں دل سے مہمانی محی الدین جیلانی

سنبھالو دین کی حالت خدا کے خاص بندے ہو

محی الدین جیلانی محی الدین جیلانی

سوالاتِ لحد میرے لیے آسان ہو جائیں

دکھا دو شکلِ نورانی محی الدین جیلانی

مسیحائے زماں تم ہو مریضوں کی دوا تم ہو

کرو بیدلؔ کی درمانی محی الدین جیلانی