میرے سر آنکھوں پہ فرمانِ رسول عربی

میرے سر آنکھوں پہ فرمانِ رسول عربی

جان و دل دونوں ہیں قربانِ رسول عربی

مسلموں تک ہی نہیں فیضِ رسالت محدود

عام ہے خلق پہ احسانِ رسول عربی

وہ فصاحت وہ بلاغت وہ صداقت وہ رموز

جیسے قرآن تھا فرمانِ رسول عربی

زعم اعدا کا ہمیشہ ہوا ثابت باطل

رحمتِ حق تھی نگہبانِ رسول عربی

آدمی کے تو بہت ہوتے ہیں حاکم لیکن

تھے ملک تابعِ فرمانِ رسول عربی

قلبِ محبوبِ خدا آئینہ نورِ خدا

حق کا عرفان ہے عرفانِ رسول عربی

نام ادیبؔ اور بس اتنا ہے تعارف میرا

ایک ادنیٰ سا ثنا خوانِ رسول عربی