بے نواؤں، بیکسوں اور غمزدوں کے واسطے

بے نواؤں، بیکسوں اور غمزدوں کے واسطے

باعثِ تسکینِ خاطر، صرف تیرا نام ہے

جس کا دل دیوانۂ سرکارِ عالم ہے اسے

فکرِ دنیا ہے نہ خوفِ گردشِ ایام ہے

درد دے یا دے سکوں میرے دلِ مجبور کو

وہ بھی تیرا لطف ہے یہ بھی تیرا انعام ہے

نام تیرا گونجتا ہے، زیرِ گردوں، چار سو

تیرا ذکرِ محتشم، صدیوں سے صبح و شام ہے

اس شہِ والا کے در کا میں بھی ہوں ادنیٰ غلام

جس کا ہے رحمت لقب جس کا محمد نام ہے

چھا رہا ہے آج بھی ہر سو ترا ابرِ کرم

مجھ سے سائلؔ پر بھی تیری بارشِ اکرام ہے