رونقِ بزمِ جہاں ہیں عاشقانِ سوختہ

رونقِ بزمِ جہاں ہیں عاشقانِ سوختہ

کہہ رہی ہے شمع کی گویا زبانِ سوختہ

جس کو قُرص مہر سمجھا ہے جہاں اے منعمو

ان کے خوانِ جود سے ہے ایک نانِ سوختہ

ماہِ من یہ نیّر محشر کی گرمی تابکے

آتشِ عصیاں میں خود جلتی ہے جانِ سوختہ

برقِ انگشتِ نبی چمکی تھی اس پر ایک بار

آج تک ہے سینۂ مہ میں نشانِ سوختہ

کوچۂ گیسوئے جاناں سے چلے ٹھنڈی نسیم

بال و پر افشاں ہوں یا رب بلبلانِ سوختہ

آتشِ تر دامنی نے دل کئے کیا کیا کباب

خضر کی جاں ہو جِلا دو ماہیانِ سوختہ

آتشِ گلہائے طیبہ پر جلانے کے لئے

جان کے طالب ہیں پیارے بلبلانِ سوختہ

اے رضاؔ مضمون سوز دل کی رفعت نے کیا

اس زمینِ سوختہ کو آسمانِ سوختہ