سرور کہوں کہ مالک_ومولا کہوں تجھے

سرور کہوں کہ مالک ومولا کہوں تجھے

باغ خلیل کا گل زیبا کہوں تجھے

حرماں نصیب ہوں تجھے امید گہ کہوں

جان مراد و کان تمنا کہوں تجھے

گلزار قدس کا گل رنگیں ادا کہوں

درمان درد بلبل شیدا کہوں تجھے

صبح وطن پہ شام غریباں کو دوں شرف

بیکس نواز گیسوؤں والا کہوں تجھے

اللہ رے ترے جسم منور کی تابشیں

اے جان جاں میں جان تجلیٰ کہوں تجھے

بے داغ لالہ یا قمر بے کلف کہوں

بے خار گلبن چمن آرا کہوں تجھے

مجرم ہوں اپنے عفو کا ساماں کروں شہا

یعنی شفیع روز جزا کا کہوں تجھے

اس مردہ دل کو مژدہ حیات ابد کا دوں

تاب و توان جان مسیحا کہوں تجھے

تیرے تو وصف عیب تناہی سے ہیں بری

حیراں ہوں میرے شاہ میں کیا کیا کہوں تجھے

کہہ لے گی سب کچھ ان کے ثنا خواں کی خامشی

چپ ہو رہا ہے کہہ کہ میں کیا کیا کہوں تجھے

لیکن رضاؔ نے ختم سخن اس پہ کر دیا

خالق کا بندہ خلق کا آقا کہوں تجھے