ہے رتبہ اس لیے کونین میں عصمت کا عفت کا

ہے رتبہ اس لیے کونین میں عصمت کا عفت کا

شرف حاصل ہے ان کو دامنِ زہرا سے نسبت کا

جو جانا خلد میں ہو پائے زہرا سے لپٹ جائے

جسے کہتے ہیں جنت ملک ہے خاتون جنت کا

نبی کے دل کی راحت اور علی کے گھر کی زینت ہیں

بیاں کس سے ہو ان کی پاک طینت پاک طلعت کا

انہی کے ماہ پارے دو جہاں کے لاج والے ہیں

یہ ہی ہیں مجمع بحرین سر چشمہ ہدایت کا

بتول و فاطمہ زہرا لقب اس واسطے پایا

کہ دنیا میں رہیں اور دیں پتہ جنت کی نکہت کا

تعالیٰ اللہ اس سعدین کے جوڑے کا کیا کہنا

کہ رحمت کی دلہن زہرا علی دولہا ولایت کا

وہ چادر جس کا آنچل چاند سورج نے نہیں دیکھا

بنے گی حشر میں پردہ گنہگارانِ امت کا

اگر سالک بھی یا رب دعویٰ جنت کرے حق ہے

جو وہ زہرا کی ہے یہ بھی تو ہے خاتونِ جنت کا