واصفِ خدا ہے پنجتن و چار یار کا

واصفِ خدا ہے پنجتن و چار یار کا

کیا مرتبا ہے پنجتن و چار یار کا

فرشِ زمیں سے عرش تک اس سے بھی کچھ ادھر

ڈنکا بجا ہے پنجتن و چار یار کا

کہتا ہے وہ مجھی سے ملے گا سراغِ حق

جو نقشِ پا ہے پنجتن و چار یار کا

پھوڑوں میں سر کو سنگ سے وحشت میں کس طرح

سودا بھرا ہے پنجتن و چار یار کا

لے چل سوئے زمینِ عرب مجھ کو اے فلک

شوق ولا ہے پنجتن و چار یار کا

جاری ہے کائنات میں شرع خدائے پاک

رستہ کھلا ہے پنجتن و چار یار کا

دل کو ملے گا خلعتِ تسلیم سے شرف

محور رضا ہے پنجتن و چار یار کا

کیونکر نہ ہو حواس و عناصر میں اتحاد

دل مبتلا ہے پنجتن و چار یار کا

شاہوں کا اوج آ نہیں سکتا خیال میں

قیصر گدا ہے پنجتن و چار یار کا

پڑھ کر درود بھیج تو احسانؔ اب سلام

ذکر آ گیا ہے پنجتن و چار یار کا