عجب پر_کشش ہے بہار_مدینہ

عجب پر کشش ہے بہار مدینہ

جسے دیکھیے ہے نثار مدینہ

شب و روز ہوتی ہے رحمت کی بارش

معطر ہیں لیل و نہار مدینہ

ہر اک سو ہیں نقش کف پا کے جلوے

منور ہے ہر رہ‌ گزار مدینہ

بہت ناز ہے تجھ کو جنت پہ رضواں

ذرا دیکھ نقش و نگار مدینہ

جھکاتی ہے سر کو یہاں سب خدائی

یہ ہے مسکن تاجدار مدینہ

وہی انتخاب نگاہ محمدؐ

ہوا باعث افتخار مدینہ

جہاں چین پاتے ہیں سب غم کے مارے

وہ ہے اللہ اللہ دیار مدینہ

وہ چہرہ الگ سب سے چمکے گا جس پہ

قیامت میں ہوگا غبار مدینہ

تڑپتا ہے فرقت میں ستارؔ مضطر

نگاہ کرم شہر یار مدینہ