جب نہ تھا فرش زمیں یہ اور یہ چرخِ کہن

جب نہ تھا فرش زمیں یہ اور یہ چرخِ کہن

تھا فقط اس وقت نورِ کبریا جلوہ فگن

نور محبوبِ خدا پھر اس طرح ظاہر ہوا

حضرتِ آدم کی پیشانی میں تھا جو ضوفگن

رفتہ رفتہ منتقل ہوتا رہا وہ نورِ پاک

صورتِ احمد میں آخر کو ہوا جلوہ فگن

تھیں اسی نورِ مجسم سے جنابِ فاطمہ

عکس نورِسیدہ ہی تھے حسین وہم حسن

حشر آگیں دور ایسا تھا کہ تھا چھایا ہوا

اہلِ بیتِ مصطفیٰ پر خانگی رنج ومحن

ٹھیک اسی ماحول میں خاتونِ جنت کے یہاں

فتح ونصرت لے کے آیا ایک فر وپنجتن

آگئی فصلِ بہاراں ہوگئی رخصت خزاں

طائرانِ باغِ دیں سب ہورہے تھے نغمۂ زن

آئی کچھ ایسی اداؤں سے نسیمِ صبح دم

غنچۂ وگل کیا ہوئے مسرور سب اہلِ چمن

جب خبر پہنچی رسول اللہ کومو لود کی

شکر کے سجدے کیے اور خوش ہوئے شاہِ زمن

سامنے لایا گیا حضرت کے جب مولودِ پاک

بوسے ہونٹوں کے لیے اور نام بھی رکھا حسن

ایسے مولودِ سعید پاک کا کہنا ہی کیا

دین اذاں کانوں میں جس کے شاہِ دیں شاہِ زمن

عرش پر بھی دھوم تھی کہتے تھے سب حوروملک

آج دنیا میں ہے روزِ عیدِ میلادِ حسن

عام انسانوں سے بالا تر نہ کیوں سمجھوں انہیں

پشت پر بٹھلائیں جس کو مصطفی چومیں دہن

آگئی پیشِ نظر فوراً شبیہِ مصطفیٰ

جس نے دیکھا مصطفیٰ کے بعد بھی روئے حسن

تھا ازل سے طے کہ ہوں گے سَمِّ قاتل سے شہید

آیا جنت سے جبھی تو سبز ان کا پیرہن

قتل وخوں سے امتِ جد کو بچانے کے لیے

پھیر لیں نظریں حکومت سے سہے رنج ومحن

وہ لبِ رنگیں جیبن ورخ وہ ابرو آپ کے

غیرت گلزارِ جنت تھے یہی چاروں چمن

جادۂ صبر ورضا میں گامزن تھے اس طرح

انقلاب آئے مگر ثابت قدم ہی تھے حسن

السلام اے نورِ عینِ مرتضیٰ وسیدہ

السلام اے ابن حیدر سبطِ پیغمبر حسن

آپ کی مقبولیت کی ہے زمانے میں یہ شان

معتقد ہیں جان ودل سے سارے شیخ وبرہمن

پھر وہی ہے اِبتلا کا دور اور فسق وفجور

پھر وہی ظلم وستم ہے پھر وہی دار ورسن

لے رہی ہے سسکیاں انسانیت دنیا میں آج

پھر وہی دورِ جہالت ہے وہی رسمِ کہن

دستگیری کیجئے اب امتِ جد کی حضور

واسطہ مشکل کشا کا اور برائے پنجتن

جام عرفاں کا فقط اک گھونٹ اے ابن سخی

نام لیوا آپ کے شدّت سے ہیں تشتہ دہن

آرزو ہے صرف اتنی کائنات دہر میں

آپ کے درکا گدا کہلائے اخترؔ یا حسن