ہیں محبوب ربُّ العلیٰ غوث الاعظم

ہیں محبوب ربُّ العلیٰ غوث الاعظم

جگر گوشۂ مصطفیٰ غوث الاعظم

ابو بکر و فاروق و عثماں کے پیارے

ہوئے وارثِ مرتضیٰ غوث الاعظم

صداقت کا یہ تھا اثر اللہ اللہ

کہا رہزنوں نے بھی یا غوث الاعظم

کہاں یہ مرا منہ کہاں نام نامی

کہوں کس زباں سے ہیں یاغوث الاعظم

شریعت کے حامی طریقت کے ہادی

ہیں پیرانِ پیر آپ یا غوث الاعظم

ہوئی دل کو تسکیں ہوئی مشکلیں حل

زباں سے کہا جب بھی یا غوث الاعظم

ہو بیزار ہم سے زمانہ تو کیا غم

نہ بیزار ہوں آپ یا غوث الاعظم

مری کشتیِ عمر ہے اب بھنور میں

اسے پار دیجئے لگا غوث الاعظم

گیا آپ کے در سے کوئی نہ خالی

بھریں میرا دامن بھی یا غوث الاعظم

جلائے ہیں ٹھوکر سےمردے ہزاروں

یہ تھا معجزہ آپ کا غوث الاعظم

بظاہر تو ہیں آپ شاہِ ولایت

حقیقت میں ہیں جانے کیا غوث الاعظم

نہ ہےمہرباں کوئی مونس نہ ہمدم

سہارا ہے بس آپ کا غوث الاعظم

گدا بن گئے جس گدائی سے سلطاں

وہی ہو گدائی عطا غوث الاعظم

مری بگڑی بن جائے دم بھر میں اخترؔ

اٹھا دیں جو چشمِ عطا غوث الاعظم