سلاطینِ جہاں آکر ہوئے سجدہ کناں خواجہ

سلاطینِ جہاں آکر ہوئے سجدہ کناں خواجہ

تمہارا آستاں ہے سجدہ گاہِ قدسیاں خواجہ

نہ کوئی مونس وہمدم نہ کوئی مہرباں خواجہ

نگاہِ لطف مجھ پر بھی انیسِ بیکساں خواجہ

مدد کیجیے بحقِ خواجۂ عثمانِ ہارونی

بھنور میں پھنس گئی ہے کشتیِٔ عمرِ رواں خواجہ

کوئی سنتا نہیں افسانۂ درد و الم میرا

مرے غم کی سنیں گے آپ ہی اب داستاں خواجہ

قدم لرزاں نہ ہونے پائیں میرے ماہِ الفت میں

عطا ہو میرے دل کو اور کچھ عزمِ جواں خواجہ

چلے نقشِ قدم پر جو وہ پہنچے اپنی منزل تک

حقیقت میں ہیں ایسے آپ میرِ کارواں خواجہ

سخی سر کار ہے تیری یہ وہ دربارِ عالی ہے

مرادیں پاگیا دل کی جو آیا ہے یہاں خواجہ

ولی کتنے بنائے زندگی بخشی ہے کتنوں کو

ہیں سلطانِ طریقت اور امامِ چشتیاں خواجہ

زمانہ درپئے آزار، دنیا مجھ سےبرہم ہے

سمجھ میں کچھ نہیں آتا کہ پاؤں اب کہاں خواجہ

ہے بیشک خلد کی نیرنگیوں میں دل کشی بے حد

زمیں پر ہے مگر روضہ ترا رشکِ جناں خواجہ

نہ جانے آپ نے کتنے غریبوں کو نوازا ہے

پریشاں حال اخترؔ کو بھی کیجے شادماں خواجہ