ترے دامن کرم میں جسے نیند آگئی ہے

ترے دامن کرم میں جسے نیند آگئی ہے

جو فنا نہ ہوگی ایسی اسے زندگی ملی ہے

مجھے کیا پڑی کسی سے کروں عرض مدعا میں

مری لو تو بس انہیں کے درِ جود سے لگی ہے

وہ جہان بھر کے داتا مجھے پھیر دیں گے خالی

مری توبہ اے خدا یہ مرے نفس کی بدی ہے

جو پئے سوال آئے مجھے دیکھ کر یہ بولے

اسے چین سے سلاؤ کے یہ بندۂ نبی ہے

اے نسیم کوئے جاناں ذرا سوئے بد نصیباں

چلی آ کھلی ہے تجھ ہہ جو ہماری بے کسی ہے

ترا دل شکستہ اختریؔ اسی انتظار میں ہے

کہ ابھی نوید وصلت ترے در سے آ رہی ہے