شان_ختم_رسل کا بیاں ہو گیا

شان ختم رسل کا بیاں ہو گیا

حق عیاں حق عیاں حق عیاں ہو گیا

ان کے حسن خداداد کا ذکر سن

دل تپاں دل تپاں دل تپاں ہو گیا

مدح سرور میں مرغ چمن ذوق سے

نغمہ خواں نغمہ خواں نغمہ خواں ہو گیا

مصطفیٰ کی صفت لکھتے لکھتے قلم

گل فشاں گل فشاں گل فشاں ہو گیا

ان کی مدحت میں یہ عاجز و نا تواں

لا بیاں لا بیاں لا بیاں ہو گیا

عشق احمد وصال خدا کے لیے

نردباں نردباں نردباں ہو گیا

نقش سم براق نبی سے فلک

کہکشاں کہکشاں کہکشاں ہو گیا

سن کے وصف جمال نبی دل مرا

شادماں شادماں شادماں ہو گیا

نام فرقت کا سنتے ہی یہ خستہ دل

نیم جاں نیم جاں نیم جاں ہو گیا

اشرفیؔ فیض نعت شہ دیں سے تو

خوش بیاں خوش بیاں خوش بیاں ہو گیا