جب کہ پیدا شہ_انس_و_جاں ہو گیا

جب کہ پیدا شہ انس و جاں ہو گیا

دور کعبے سے لوث بتاں ہو گیا

دل مکان شہ عرشیاں ہو گیا

لا مکاں لا مکاں لا مکاں ہو گیا

سر فدائے رہ جان جاں ہو گیا

امتحاں امتحاں امتحاں ہو گیا

ان کے جلوے کا جس دم بیاں ہو گیا

گلستاں مجمع بلبلاں ہو گیا

تھا براق نبی یا کہ نور نظر

یہ گیا وہ گیا وہ نہاں ہو گیا

ہر ستارہ شب مولد مصطفیٰ

شمع داں شمع داں شمع داں ہو گیا

چرخ گردوں ترے روضہ پاک کا

سائباں سائباں سائباں ہو گیا

جس کو اس کے مکاں کا پتا مل گیا

بے نشاں بے نشاں بے نشاں ہو گیا

حق شفاعت سے تیری گنہ گاروں پر

مہرباں مہرباں مہرباں ہو گیا

گلشن طیبہ میں طائر سدرہ کا

آشیاں آشیاں آشیاں ہو گیا

یا نبی لو خبر آتش غم سے میں

ؔتفتہ جاں ؔتفتہ جاں ؔتفتہ جاں ہو گیا

گزرے جس کوچہ سے شاہ گردوں جناب

آسماں آسماں آسماں ہو گیا

عشق ابرو میں میں رمز قوسین کا

نکتہ داں نکتہ داں نکتہ داں ہو گیا

کس کے روئے منور کی یاد آ گئی

دل تپاں دل تپاں دل تپاں ہو گیا

طوطی سدرہ مدح رخ پاک میں

گل فشاں گل فشاں گل فشاں ہو گیا

طوطی اصفہاں سن کلام رضا

بے زباں بے زباں بے زباں ہو گیا