رہا جوش_محبت کا یوں ہی گر موجزن طوفاں

رہا جوش محبت کا یوں ہی گر موجزن طوفاں

فدا ہو جائیں گے ہم آپ پر یا حضرت جیلاں

یہ ہیں سرتاج اہل چشت وہ بغداد کے سلطاں

معین الدیں کے صدقے ہوں محی الدین کے قرباں

محمدؐ کی جو میمیں ہیں وہ ان ناموں میں شامل ہیں

معین الدیں اگر دیں ہیں تو محی الدین ہیں ایماں

وہ اہل بیت کی سب خوبیوں کا عطر ہیں دونوں

سراپائے کرم ہیں یہ وہ ہیں خلق عظیم الشاں

معین الدیں حسن چشتی کریں گے پار اب کشتی

تو محی الدین ڈالیں گے دل مردہ میں میرے جاں

مرے آقا مرے مولا مرے والی مرے وارث

معین الدین اجمیری محی الدیں شہ جیلاں

سگ درگاہ عالی ہے اسے در پر بلا لیجے

پریشاں حال کب تک یوں پھرے گا حیرتؔ حیراں