وہ جنتِ نگاہ وہ منظر قریب ہے

وہ جنتِ نگاہ وہ منظر قریب ہے

اے دل ریاض روضۂ اطہر قریب ہے

اے شوقِ بے قرار مقام ادب ہے یہ

آرام گاہِ شافع محشر قریب ہے

وہ عطر بیز نکہت طیبہ خدا گواہ

جیسے کسی کی زلف معنبر قریب ہے

اب تشنہ کامیوں کا بھی شکوہ نہیں مجھے

باب حریم ساقیٔ کوثر قریب ہے

مٹتا ہے بُعد قرب مدینہ کا فرق بھی

وہ وقت بھی اب اے دلِ مضطر قریب ہے

اٹھتی نہیں نگاہ فرشتوں کی بھی جہاں

وہ جلوہ زارِ حسن وہ منظر قریب ہے

اب سر کے بل چلیں گے دیارِ حبیب میں

آنکھوں سے دور دل سے تو وہ در قریب ہے

مئے جس سے پی بلال نے اور بایزید نے

اب میرے دست رس سے وہ منظر قریب ہے

وہ آگیا دربارِ حبیبِ خدا امینؔ

اب وہ حیاتِ عرش مقدر قریب ہے