قدم رک گئے ہیں جبیں جھک گئی ہے نہ جانے یہ کیسا مقام آ گیا ہے

قدم رک گئے ہیں جبیں جھک گئی ہے نہ جانے یہ کیسا مقام آ گیا ہے

نگاہوں میں باب السلام آ گیا ہے زباں پر محمد کا نام آ گیا ہے

میں مکے سے جس دم مدینے چلا ہوں کرشمہ یہ معجز نما دیکھتا ہوں

محمد کے در پہ ادا سجدہ کرنے میرے ساتھ بیت الحرام آ گیا ہے

کبھی گرد روضے کے میں گھومتا ہوں کبھی روضے کی جالیاں چومتا ہوں

محمدؐ کا دیوانہ کہتے ہیں مجھ کو یہ دیوانہ پن میرے کام آ گیا ہے

جدھر دیکھتا ہوں ادھر ہیں چمکتے محمدؐ کے حسن منور کے جلوے

کسے تاب ہے جو کہ نظریں اٹھائے حسینان کل کا امام آ گیا ہے

کہیں انبیا بھی مؤدب کھڑے ہیں فرشتے کہیں سر جھکائے پڑے ہیں

مچی دھوم ہر سو مقام ادب ہے کہ دربار خیر الانام آ گیا ہے

یہ سب کملی والے کا لطف و کرم ہے کہ چھایا ہوا ہر سو ابر کرم ہے

پیو بادہ نوشہ یہ پینے کا دن ہے کہ گردش میں کوثر کا جام آ گیا ہے

امیرؔ حزیں جب مدینے میں پہنچا مچی دھوم ہر سو ہوا ہے یہ چرچا

چلو چل کے دیکھیں محمدؐ کے در پر جو بے دام بکنے غلام آ گیا ہے