آنکھوں میں نور تیرا دل میں سرور تیرا

آنکھوں میں نور تیرا دل میں سرور تیرا

دروازے سے ہے گھر تک سارا ظہور تیرا

جنت میں بھی ہے چرچا اے رشک حور تیرا

شہرہ ہے اللہ اللہ اب دور دور تیرا

تو مہر تیرے آگے سب قطرہائے شبنم

ان کا کہاں ٹھکانا جب ہو ظہور تیرا

اے چشم شوق وہ تو ہر رنگ میں ہے ظاہر

اب بھی جو تو نہ دیکھے تو ہے قصور تیرا

میں آئینہ ہوں تیرا تو آئینہ ہے میرا

تجھ میں ظہور میرا مجھ میں ظہور تیرا

خورشید و ماہ سب میں جلوہ ترے ہیں لیکن

ایسی کہاں ہیں آنکھیں دیکھیں جو نور تیرا

ناداں امیرؔ نا حق امیدوار ہے تو

دل لے کے پھیر دے گا اب وہ ضرور تیرا