تعالی اللہ ایسی شان و شوکت فاطمہ زہرا

تعالی اللہ ایسی شان و شوکت فاطمہ زہرا

پیمبر دیں تمہیں خود اٹھ کے عزت فاطمہ زہرا

مری عزت مری عظمت سیادت فاطمہ زہرا

ہیں سب ہی آپ کی مرہون منت فاطمہ زہرا

بچھا کر منتظر ہیں راہ میں ہم چشم و دل اپنے

کبھی آئیں سرِ فرش عقیدت فاطمہ زہرا

خدا کی بندی ماں حسنین کی کونین کی ملکہ

نبی کا دل علی کے دل کی راحت فاطمہ زہرا

تری صورت نہیں پردے میں رکھی ہے مشیت نے

حبیب اللہ کی شکل و شباہت فاطمہ زہرا

بوقت رحلتِ مرسل بیانِ شدت غم تھا

تمہارا کلمہ دلگیر صبت فاطمہ زہرا

وہ سائل در گہہِ حق سے کبھی خالی نہیں لوٹے

ملا جن کو ترا بابِ اجابت فاطمہ زہرا

نبی کی مہبط لطف و عنایت فاطمہ زہرا

شفیقہ مونسہ بر حالِ امت فاطمہ زہرا

پلایا دودھ جو حسنین کو تم نے تلاوت میں

بنا وہ سرخیِٔ خون شہادت فاطمہ زہرا

زباں نے جب زباں پائی تو پھر سننے کو ملتا تھا

دہن سے آپ کے نطقِ نبوت فاطمہ زہرا

ہوائے مشکبار اٹھ کر مشام جاں سے کہتی ہے

تری تربت سے ہے مانوس جنت فاطمہ زہرا

میں امجدؔ آپ سے ہوں آپ ہی سے عرض کرتا ہوں

مجھے حق ہے مجھے دیجے زیارت فاطمہ زہرا