ستم شعار ہے عہد خزاں غریب نواز

ستم شعار ہے عہد خزاں غریب نواز

نگاہِ لطف مرے مہرباں غریب نواز

ہزار ہوش ربا غم کی آندھیاں ہیں مگر

بہت ہے ہم کو تمہاری اماں غریب نواز

کبھی نہ کاٹ سکے گا دلوں کو در سے ترے

زمانہ لاکھ چلائے زباں غریب نواز

کہیں فرید کہیں قطب ہیں نظام کہیں

تمہارے عشق کی سر مستیاں غریب نواز

ریاض خلدِ مدینہ کا باب ہے اجمیر

ترا دیار ہے جنت نشاں غریب نواز

رہین منت دنیا نہیں ترا سائل

ترا فقیر ہے شاہِ جہاں غریب نواز

غریب کہتے ہیں اپنا تمہیں بآسانی

نہیں یہ عشق کا سودا گراں غریب نواز

خدا کے فضل سے جاں گیری و جہاں گیری

لیے ہوئے ہیں ترے نیم جاں غریب نواز

تمہاری راہ میں امجدؔ ہے ’’قل ھو اللہی‘‘

نشان ہے یہ کرامت نشاں غریب نواز