احمدِ مرسل ہے اپنے وقت کا مسعود پاک

احمدِ مرسل ہے اپنے وقت کا مسعود پاک

اور مرا مولا مرا مشکل کشا مسعود پاک

گفتگو میں حلم و حکمت، آنکھ میں جاہ و جلال

بالیقیں تو ہے حسن کا آئینہ مسعود پاک

تیرے لب، رخسار، ابرو سب حسینِ پاک سے

کیوں نہ ہوں، شبیر ہے بابا ترا، مسعود پاک

سیدِ سجاد سے صبر و رضا تجھ کو ملا

اور باقر سے ملا علمِ ہدیٰ، مسعود پاک

جعفرِ صادق سے تو نے پائی ہے صدق و صفا

موسیٰ کاظم کی طرح حاجت روا، مسعود پاک

تجھ سے راضی ہے خدا، مخلوق بھی کچھ اس طرح

کہہ رہے ہیں خود رضا یا الرضا، مسعود پاک

تیرے در سے آج تک خالی کوئی لوٹا نہیں

حضرتِ جواد سی تیری عطا مسعود پاک

تو نقی سا ہادیِ مطلق زمانے بھر کا ہے

رہبرِ گم گشتگانِ قافلہ، مسعود پاک

تو نے پائی ہے امامِ عسکری سی منزلت

منبعِ حق، پیکرِ جود و سخا، مسعود پاک

مہدیِ دوراں کے بارے میں سنا تو یوں لگا

پردۂ غیبت میں ہو جیسے چھپا، مسعود پاک

تیرے قدموں کی مہر ہے اؤلیاوں کا شرف

میں نے مانا ہے تجھے غوث الوریٰ مسعود پاک

تو امامِ اؤلیائے ہند ہے میراں مرے

نائبِ خیرالوریٰ، خواجہ پیا، مسعود پاک

اس قدر ضم ہے تری ہستی فریدالدین میں

زہد میں ہے تو مثالِ انبیا، مسعود پاک

پوچھ لے کوئی انسؔ گر آپ سے ایماں ہے کیا

برملا کہہ دیجیو ایماں مرا مسعود پاک