عجب آئینہ_حسن_مصطفیٰ ہے

عجب آئینہ حسن مصطفیٰ ہے

کہ جلوہ اپنی صورت دیکھتا ہے

کلام پاک اے انصار کیا ہے

سراپا نعت محبوب خدا ہے

تمہارا آستاں کعبہ کا مقصود

تمہارا تذکرہ حمد خدا ہے

گری تھی کوہ فاراں پر کبھی برق

زمانہ آج تک حیرت زدہ ہے

جمال حیدر و حسنین و زہرا

مکمل شرح حسن مصطفیٰ ہے

خدا بھی ناز برداروں میں جس کے

میں اس کا ہوں مرا کیا پوچھنا ہے

مدینے کا وقار اللہ اکبر

مدینہ کعبۂ اہل وفا ہے

جہاں جبریل تھک جائیں وہاں سے

مقام حضرت خیر الوریٰ ہے