آرزوئے جہاں رشکِ فاراں ہوا
آرزوئے جہاں رشکِ فاراں ہوا
رونقِ دو جہاں شاہِ خوباں ہوا
جب درودوں کی کلیاں نچھاور ہوئیں
خلد کی زیب و زینت کا ساماں ہوا
لمس پا کر ترے نقشِ نعلین کا
ذرۂ خاک بھی ماہِ تاباں ہوا
کوچۂ نعت میں سب مراتب ملے
حرف مدحت بنا تو درخشاں ہوا
ان کی چوکھٹ گدائی کی خاطر ملی
میں بجا اس عنایت پہ نازاں ہوا
ماہ و خورشید و انجم خجل ہو گئے
ان کا اسمِ گرامی فروزاں ہوا
دیکھ کر رفعتِ شاہ معراج پر
روئے افلاک شاداں و فرحاں ہوا
آپ ہی کے وسیلے سے شاہِ عرب
ہم کو معبودِ بر حق کا عرفاں ہوا
آپ آئے تو دف ہو گئیں دھڑکنیں
اور دل کی گلی میں چراغاں ہوا
کن کا مقصود اشفاقؔ شاہِ زمن
جانِ ہر دو سرا جانِ جاناں ہوا
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
