السلام اے ساقیٔ کوثر امام المتقیں

اے ساقی کوثر امام المتقیں آپ پر سلام ہو، آپ نبی کریم کی جان کا راز ہیں، اور صراط مستقیم پر چلنے والوں کے رہنما ہیں۔

آپ کا ہاتھ خدا کا ہاتھ ہے اور آپ کا فیض، فیض ابدی ہے، آپ کا جام، جام ازلی ہے جس میں شراب الطاہرین ہے۔

آپ کا عمل، رسول کا عمل ہے اور آپ کا قول نبی کا قول ہے، آپ کا دین، خدا کا دین ہے اور آپ کا علم، علم الاولین ہے۔

آپ روح عصمت ہیں، جان رحمت ہیں، آپ باطن کے آئینہ دار ہیں، آپ نور ایمان ہیں، شمع عرفان ہیں اور آفتاب آخریں ہیں۔

آپ ابو تراب اور فخر آدم ہیں، آفتاب آپ کی خاکِ در پر صبح و شام اپنی پیشانی رگڑتا ہے۔

آپ قلعۂ خیبر کے فاتح مبیں ہیں، آپ مفہوم ’’نحن اقرب‘‘ ہیں اور ایقان کا دروازہ کھولنے والے ہیں۔

آپ آٹھ گلستانوں کے رنگ و بو اور نو آسمانوں کے آفتاب ہیں اور اپنی کھلی کرامتوں کے لحاظ سے دونوں عالم کے مشکل کشا ہیں۔

آپ دین کے ہادی، حق و باطل کا فیصلہ کرنے والے اور حضرت محمد مصطفیٰ کے وصی ہیں، آپ کی قوت معجز نما ہے اور خوراک جوکی روٹی ہے۔

آپ کی ابتدا محویت میں محویت اور فنا کے اندر فنا ہے اور آپ کی انتہا، ذات رب العالمین کے ساتھ بقا ہے۔

آپ حیدر کرار، نبی کے داماد اور خدا کے شیر ہیں، کافروں کے قاتل، اللہ کی تلوار اور مؤمنوں کے امیر ہیں۔

بلحاظ رفعت آپ آسمان پر حضرت عیسیٰ کے ماند ہیں اور باعتبار تمکین، زمین پر حضرت محمد مصطفیٰ کی مثال ہیں۔