مرا وطن، مری دھرتی کی ایک جنت ہے

مرا وطن، مری دھرتی کی ایک جنت ہے

یہاں کی آب و ہوا خوش گوار ہے کتنی!

یہاں کے سبزہ و گل میں بھی کیا لطافت ہے

مرے وطن میں ہے جو شئے وہ خوبصورت ہے

مرا وطن مری دھرتی کی ایک جنت ہے

یہی تو ہے وہ زمیں سات سو برس پہلے

کیا تھا جس کی فضاؤں سے پیار خسرو نے

یہی تو ہے وہ زمیں، سات سو برس پہلے

کئے تھے جس پہ دل و جاں نثار، خسرو نے

یہی زمیں ہے جہاں سات سو برس پہلے

مری زبان کے اک بے مثال شاعر نے

مری زبان میں زورِ قلم دکھایا تھا

مری زمین کی عظمت کا راگ گایا تھا

یہی زمیں ہے جہاں، سات سو برس پہلے

مری زبان کا معمار اپنے گیتوں میں

مری زمین کی فصلوں کا ذکر کرتا تھا

مری زمین کی صبحوں کا ذکر کرتا تھا

مری زمین کی شاموں کا ذکر کرتا تھا

مری زمین کا باغوں کا ذکر کرتا تھا

مری زمین کے پھولوں کا ذکر کرتا تھا

مرے چمن کا وہ طوطی تو، اب نہیں ہے مگر

جو اس نے چھوڑی ہے وہ یادگار باقی ہے

مرے وطن کا وہ گایک تو اب نہیں ہے مگر

وہ چھیڑتا تھا جسے، وہ ستار باقی ہے

یہی ستار، مری قیمتی امانت ہے

یہی ستار، مری لازوال دولت ہے

یہی ستار مری شان، میری شوقت ہے

نہیں ہے ساز کوئی اس ستار سے بڑھ کر

ہیں اس کے تاروں میں پوشیدہ پیار کے نغمے

ہیں اس کے تاروں میں پنہاں بہار کے نغمے

یہی ستار مجھے آج پھر اٹھانے دو

کہ سن لیں مشرق و مغرب پیام خسرو کا

یہی ستار مجھے جھوم کر بجانے دو

کہ گونج اٹھے زمانے میں نام خسرو کا

اسی ستار پہ وہ راگ مجھ کو گانے دو

کہ جن سے نوعِ بشر سیکھ لے روا داری

کرے نہ کوئی کسی کی یہاں دل آزاری