وصف کس سے ہو بیاں حسنِ خود آرا تیرا

وصف کس سے ہو بیاں حسنِ خود آرا تیرا

نقشِ ارژنگِ تحیر ہے سراپا تیرا

سنگ خارا میں امانت تری الفت کے شرر

کون سے قلب میں بھڑکا نہیں شعلہ تیرا

تو شجر، انبیا ڈالی، عرفا ہیں شاخیں

ظلِّ رحمت جسے کہیے وہ ہے سایہ تیرا

شہدا گل ہیں، ثمر غوث ہیں غنچے اقطاب

رنگِ نیرنگ ہر اک شے سے نرالا تیرا

رول کر لائی ہے در ہائے مضامیں تازہ

طبع لہرائی ہے ہاں لکھے سراپا تیرا

فرق خوبی ہے ترا حاملِ سرِ لاہوت

کنزِ مخفی کا خزانہ ہے کہ سینہ تیرا

جلوے پنہاں تری صورت میں ہیں وجہ اللہ کے

صبغۃ اللہ ہے رنگ اے گلِ رعنا تیرا

آبرو صبحِ سعادت کی جبیں پُر نور

اوجِ طالع کا درخشاں ہے ستارا تیرا

غیرتِ صبحِ ازل ہے ترے عارض کی بہار

روکشِ شام ابد زلف کا لٹکا تیرا

قبلہ طاعتِ عشاق ہے چشمِ بدور

بے تکلف خمِ ابروئے دل آرا تیرا

دل یک خلقِ خدا تیرِ مژہ کا بسمل

لبِ اعجاز ہے اعجازِ مسیحا تیرا

ہاتھ سے جو جسے چھو لے یدِ بیضا ہو جائے

یدِ قدرت یہ محقر سا ہے صدقا تیرا

مدحِ انگشت میں تیری نہیں جائے انگشت

جاری ہر ایک سے رحمت کا ہے چشمہ تیرا

اے کہ ہے کون و مکاں میں ترے اکرام کی دھوم

ناشنا سائے کرم کیوں رہے بندہ تیرا

آج دامنِ درِ مقصود سے بھر دے اس کا

ہست یک موجِ تو صدقۂ حاجاتے را

جھولی پھیلا بہ امیدِ کرم آتا ہے

لاج رکھ لے کہ ہے بیدلؔ ترا منگتا تیرا