مدینہ جاؤ تو اتنا پیام کہہ دینا

مدینہ جاؤ تو اتنا پیام کہہ دینا

کہ ہند میں تپاں اک غلام کہہ دینا

تڑپ تڑپ کے گذرتے ہیں رات دن اس کے

عجیب طرح کے ہیں صبح و شام کہہ دینا

مسلسل آنکھ سے گرتے ہیں اشک خون جگر

غموں کا اس پہ ہے اک اژدہام کہہ دینا

ضرور کہنا کہ بے بس ہے اور ہے مجبور

سحر کے بھیس میں آتی ہے شام کہہ دینا

چھپا کے رکھنا نہ کچھ بھی حضور اقدس سے

جو تم نے دیکھا ہے سب لا کلام کہہ دینا

یہ کہنا بھول گیا میں کہ پیشِ گنبد سبز

ادب کے ساتھ تو پہلے سلام کہہ دینا

جو تجھ سے پوچھیں کہ وہ کون شخص ہے بتلا

تو ان سے چپکے سے بہزادؔ نام کہہ دینا