الٰہی میرا مدینہ مقام ہو جائے

الٰہی میرا مدینہ مقام ہو جائے

وہیں پہ زیست کا قصہ تمام ہو جائے

کچھ اس ادا سے کروں شکر کے ادا سجدے

مری جبیں کا زمانے میں نام ہو جائے

کسی کے سامنے پہنچوں بصد نیاز وفا

کسی حضور میں میرا سلام ہو جائے

ملے کچھ اتنا کہ محرومیاں بھی حیراں ہوں

مراد یاب دل تشنہ کام ہو جائے

درِ حبیبِ خدا کے ہوں روز نظارے

کہ جو سحر بھی ہو ہم رنگ شام ہو جائے

الٰہی تو ہی سہارا ہے غم نصیبوں کا

ترا کرم ہو تو قسمت کا نام ہو جائے

الٰہی تو لب بہزادؔ کی دعا سن لے

دعا یہ ہے اسے طیبہ میں شام ہو جائے