اے عندلیبِ خوش نوا پروانۂ نظامِ دیں

اے عندلیبِ خوش نوا پروانۂ نظامِ دیں

روحانیت نواز ہے تیرا کلامِ دل نشیں

سلسلۂ نظامیہ ہے داستانِ خسروی

مردِ حقیقت آشنا تھا آستان پہ بدگماں

اور وارداتِ قلب تھے شیخ طریق پر عیاں

کس درجہ ناز آفریں تھا امتحانِ خسروی

دل ایک ہی نگاہ میں محرمِ راز بن گیا

اور اک کبوترِ حزیں دم بھر میں باز بن گیا

عشق کی ایک جست میں بدلا جہانِ خسروی

درویشِ بے مثال تو شاعر بے نظیر تو

نازشِ خانقاہ تو نور نگاہِ پیر تو

فقر کی آن بان پر قائم ہے شانِ خسروی

ہند و تتار و پارس کو شیر و شکر بنا دیا

سب کی زبان سے تو نے اک جادو نیا جگا دیا

اردو زبان کی جان ہے اب تک زبانِ خسروی

فرما رہا ہے پیر ہی شان میں یہ مرید کی

من تو شدم تو من شدی من تن شدم تو جان شدی

محبوبِ حق کی جان تھی لا ریب جانِ خسروی