مدینہ کا عزمِ سفر اللہ اللہ

مدینہ کا عزمِ سفر اللہ اللہ

نبی کی ہے دل پہ نظر اللہ اللہ

سمجھ لے جو یہ راز کیا ڈر ہے اس کو

ادھر ہیں محمد ادھر اللہ اللہ

کرم ہے یہ ربط و نسبت کا ورنہ

مرا دل محمد کا گھر اللہ اللہ

جو لے نامِ پاک اس کی فتح مبیں ہے

قدم چومیں فتح و ظفر اللہ اللہ

یہ مانا کہ ہیں عبد وہ حق نہیں ہیں

ہیں نورِ خدا سر بسر اللہ اللہ

جو خیرالبشر ہیں جو خیرالرسل ہیں

تو کہتا ہے ان کو بشر اللہ اللہ

ہے اس بابِ رحمت کا جبریل درباں

بیاں کیا ہو تقدیسِ در اللہ اللہ

ہے عشقِ محمد سے تکمیل ایماں

نہیں ہے اگر یہ نہ کر اللہ اللہ

اگر چہ یہ بیہوشؔ ہے بیخودی میں

محمد ہے لب پر مگر اللہ اللہ