یہ شب اور یہ شب کی بہار اللہ اللہ

یہ شب اور یہ شب کی بہار اللہ اللہ

یہ چاند اور یہ اس کا نکھار اللہ اللہ

مجلیٰ مجلیٰ درخشاں درخشاں

ہر اک شئے ہی خود جلوہ بار اللہ اللہ

فضا میں تجلی خلا میں تجلی

ہے ظلمت کو اک انتشار اللہ اللہ

چمن مہکا مہکا جہاں مہکا مہکا

ہر اک ذرہ ہے عطر بار اللہ اللہ

ملائک میں اک شور صلی علیٰ ہے

دو عالم میں ہے اک پکار اللہ اللہ

ازل سے ہے جو تاج شاہی کا حامل

ہے آنے کو وہ تاجدار اللہ اللہ

نبی مکرم شفیع دو عالم

جو ہے رحمت کردگار اللہ اللہ

امید کل آرزوئے زمانہ

جو ہے نازش روزگار اللہ اللہ

حبیب الٰہی طبیب دوعالم

دو آئے دل بے قرار اللہ اللہ

غریبوں کا والی یتیموں کا مولیٰ

کرم گستر و غم گسار اللہ اللہ

غلاموں کا ماوا فقیروں کا ملجا

اخوت کا آئینہ وار اللہ اللہ

سر بزم اک شمع ہر رنگ و ہر گوں

سر رزم اک شہسوار اللہ اللہ

یہ عالم کہ باد صف مختاریٔ کل

یہ علم اور یہ انکسار اللہ اللہ

گماں کو بھی آخر یقیں ہو رہا ہے

حقیقت ہے خود آشکار اللہ اللہ

درود و سلام اس گل سر حق پر

بہاروں کی جو ہے بہار اللہ اللہ

ہوں بہزادؔ مست ولائے محمد

ازل سے ہے اب تک خمار اللہ اللہ