اسی سے صاف ظاہر ہے تمہارا مرتبہ خواجہ

اسی سے صاف ظاہر ہے تمہارا مرتبہ خواجہ

کہ اٹھتی ہے تمہاری سمت چشمِ اؤلیا خواجہ

تحیر میں پڑی ہے کیوں مری چشمِ تماشائی

نظر کی ابتدا خواجہ، نظر کی انتہا خواجہ

تواتر سے مرے سجدوں کے کیوں دنیا کو حیرت ہے

مجھے تو عشق نے بخشا تمہارا رابطہ خواجہ

در و دیوار کو اک وجد ہے سکتہ میں ہے دنیا

زبانِ بے زبانی کہہ رہی ہے ماجرا خواجہ

تمہارے در پہ آ کر دین دنیا پا لیے میں نے

تمہیں سے ہو رہے ہیں دونوں عالم کی بنا خواجہ

زہے شانِ کریمی اب میرے دامن میں سب کچھ ہے

مری امید سے تم نے دیا مجھ کو سوا خواجہ

کوئی ہر گام پہ یہ کہہ رہا ہے میرے کانوں میں

سراجِ عارفاں خواجہ ہیں جانِ اؤلیا خواجہ

مرے عالم کو اے بہزادؔ اہلِ دل ہی سمجھیں گے

زبانِ عشق سے کہتا ہوں میں ہر وقت یا خواجہ