یا خواجہ معین_الدیں چشتی سلطان_الہند غریب_نواز

یا خواجہ معین الدیں چشتی سلطان الہند غریب نواز

یا واقف راز خفی و جلی سلطان الہند غریب نواز

آگاہ ہو میرے حال سے تم گم کردہ خرد ہوں ہوش میں گم

دشمن ہیں پئے آزار وہی سلطان الہند غریب نواز

فریاد تمہیں سے ہے میری تکلیف سہی کیسی کیسی

ہو داد طلب کی دادرسی سلطان الہند غریب نواز

منہ عیش و طرب نے پھیر لیا دن رات کے غم نے گھیر لیا

سب دور ہوں میرے رنج دلی سلطان الہند غریب نواز

دل اور جگر خم خانہ عشق آنکھیں ہوں مری پیمانۂ عشق

اے عاشق زار خدا و نبی سلطان الہند غریب نواز

لائی ہے مجھے امید کرم اس خاک کی اس در کی ہے قسم

آیا ہوں پئے حاجت طلبی سلطان الہند غریب نواز

کیا میری زباں کیا میرا بیاں میں ہیچ مداں تم پر قرباں

کہتے ہیں ملک بھی تم کو یہی سلطان الہند غریب نواز

یہ داغؔ کہاں تک رنج سہے تم سے نہ کہے تو کس سے کہے

تم آل نبی اولاد علی سلطان الہند غریب نواز