جو غیر کی ہو بہشت تو ہے سلام_خواجہ امیر خسرو

جو غیر کی ہو بہشت تو ہے سلام خواجہ امیر خسرو

کہ اس روش پر تو ایک ہے بس امام خواجہ امیر خسرو

نہ کیوں شب لا مکاں فروزاں پھر آنکھوں میں ہوتی جب تھی

نظام کے گیسوؤں کے سائے میں شام خواجہ امیر خسرو

زباں شستہ بیاں شگفتہ تو فکر عرشی ابوالحسن کی

کلام کا بھی امام ٹھہرا کلام خواجہ امیر خسرو

ادب کے آنگن میں ٹھنڈی ٹھنڈی سی چاندنی خوب کھل رہی ہے

چمک رہا ہے فلک پہ ماہ تمام خواجہ امیر خسرو

عجیب پر لطف چال ان کی ادب کی راہوں میں ہم نے دیکھی

صبا کو شرما رہی ہو جیسے خرام خواجہ امیر خسرو

خراج دیجئے سخنوران جہاں ادب سے ابوالحسن کو

ادب کے کشور میں چل رہا ہے نظام خواجہ امیر خسرو

ٹھہر گیا پا کے ان کے نعلین کی مہک راستے میں امجدؔ

نظام کے گیسوؤں سے مہکا مشام خواجہ امیر خسرو