مرے مخدوم لو خبر میری

مرے مخدوم لو خبر میری

اب ہے حالت تتر بتر میری

تھا کچھ ایسا خیال صابر کا

نہ لگی آنکھ رات بھر میری

تم کو دیکھوں تو کس طرح دیکھوں

آنکھ میری نہ وہ نظر میری

نہ لگی پشت بستر غم پر

شام سے لے کے تا سحر میری

سوئے کلیر کبھی تو بلوالے

اتنی امید پوری کر میری

تیرا عاشق ہوں میں تو اے صابر

حور پر کیا پڑے نظر میری

اشک خوں کیوں نہ ٹپکے آنکھوں سے

بن گئی آہ نیشتر میری

رات بھر نیند کیوں نہیں آتی

صبح محشر ہے کیا سحر میری

فخرؔ ہے فخر میرا مرنا بھی

چار سو گرم ہے خبر میری