جبینِ سیدالکونین پر جلووں کی تابانی

جبینِ سیدالکونین پر جلووں کی تابانی

جو دیکھے اس کو حاصل کیوں نہ ہوں انوارِ ایمانی

نہ تھا کچھ واسطہ تہذیب سے جن کو زمانہ میں

سکھا دی آپ نے ان گلہ بانوں کو جہاں بانی

مقدر اوج پر اس رات میں تھا عرشِ اعظم کا

ہوئی جب آپ کو معراجِ روحانی و جسمانی

رسول اللہ کے فرمان پر قرباں نہ ہو کوئی

بھلا ہو سکتی ہے اس سے بھی بڑھ کر کوئی نادانی

شہِ لولاک ہی کو وجہِ خلق دو جہاں کہیے

حضورِ پاک ہیں واللہ روحِ بزمِ امکانی

بفضلِ حق تعالیٰ اور طفیلِ حضرتِ والا

ہوئی ہے اشرفِ خلقِ خدا یہ نوع انسانی

رموزِ عاجزی و بندگی سکھلائے بندوں کو

مٹا دی آپ نے دنیا سے فرعونی و ہامانی

کیا اعلان جب سے آپ نے الفقر فخری کا

فقیر بے نوابھی آپ کے کرتے ہیں سلطانی

عیاں ہے آپ کی سیرت علی خلق عظیمِِ سے

اسی سیرت کی ہیں تفسیر سب آیات قرآنی

شفیع المذنبیں ہیں رحمۃ للعالمیں اے فخرؔ

گناہوں کی مرے ہے گو فزونی اور فراوانی