ادائے صابری مولیٰ زمانہ سے نرالی ہے

ادائے صابری مولیٰ زمانہ سے نرالی ہے

مثالِ حق عیاں ان کی دلیل بےمثالی ہے

ترے دربار کا میدان رشک صحن جنت ہے

خجل ہے جس سے طوبیٰ وہ ترے گولر کی ڈالی ہے

نہالانِ چمن پھولیں پھلیں کیوں کر نہ پھر ہر دم

ترے گلزار کا خواجہ معین الدین والی ہے

نہ دوں تشبیہ ہر گز نرگس و چشم غزالاں سے

وہ دلکش روضۂ مخدوم کی ہر ایک جالی ہے

ملک کیا حور و غلماں کو ہی خواہش خاکروبی کی

علاؤالدین کے دربار کی کیا شان عالی ہے

یباں کیا ہو مزارِ پاک کی نیرنگیٔ شوکت

کبھی شان جلالی ہے کبھی شانِ جمالی ہے

نہ کیوں ہو تکیۂ فقرا تری ذاتِ مقدس پر

امام فقر ہے توہی حبیبِ لایزالی ہے

نہ لے وہ بھول کر بھی گر کوئی تختِ سکندر دے

درِ مخدوم صابر کا جو ادنا بھی سوالی ہے

خیالِ غیر سے نفرت نہ ہو کس طرح فرحتؔ کو

تری صورت فقط آئینۂ دل میں جمالی ہے